"సమస్యాపూరణం:

ఈ క్రింది "సమస్యని" అంటే ఆ వ్యాక్యన్ని యదాతధంగా ఒక పద్యంలోకి ఇమిడ్చి వాడుకుంటూ రాయాలి. ఒకవేళ పద్యం కాకపోయినా ఒక కవిత రాసినా కూడా వాటిని మేము సగౌరవంగా స్వీకరిస్తాము. మీ జవాబులు ఈ-మెయిల్ (విద్యుల్లేఖ) ద్వారాకాని (rao@infoyogi.com)  ఫాక్స్ ద్వారాకానీ (fax: 408-516-8945) మాకు అక్టోబర్ 20వ తారీఖు లోపల పంపించండి. ఉత్తమ పూరణలను తరువాయి సంచికలో ప్రచురిస్తాము. 

ఇక్కడ రెండు సమస్యలను ఇస్తున్నాం. ఈ రెండికీగానీ, లేక ఏ వొక్క దానికైనాగానీ మీరు మీ పూరణలను పంపవచ్చు

ఈ  మాసం సమస్యలు

తే.గీ.|| జోకు రాని తెలుగు వాడు జోకరేను

కం.|| శూన్యమె ఆనందమయ్యి శోభిలు భువిలో!

క్రితమాసం సమస్యలు

ఆ.వె|| దొంగ కాని వాడు దున్నపోతు !

కం|| కారులు ఉంటే నడకల కసరత్తు యగున్

ఈ సమస్య లకు వచ్చిన ఉత్తమ పూరణలు ఇలా వున్నాయి.

మొదటి పూరణ -  వేదుల బాలకృష్ణమూర్తి, శ్రీకాకుళం

ఆ.వె.|| నేర్పు విద్య యందు నిపుణతకై పని

దొంగ కాని వాడు దున్నపోతు

వలెను కష్టపడిన ఫలితము అనుభవించు

బాలకృష్ణ మాట పసిడి మూట

ఆ.వె.|| దున్నపోతు నేల దున్నగ కష్టించు

దొంగతనము చేయు దొంగ,  కాని

వాడు దున్నపోతువలెను శ్రమించడు

తెలుగు కవితలోని జిలుగులెవియె

రెండవ పూరణ - యం.వి.సి.రావు, బెంగుళూరు,

          కం||     భారీ దేహపు బాధతొ           

                   సరిమార్గము జూపుమనిన సన్నితుడనియెన్

                   కారుల దిరుగక జోరుషి

                   కారులు వుంటే నడకల కసరత్తు యగున్

ఆ.వె||    మదిని కోర్కెలెరిగి మారుమాటాడక

                   మగడు సర్వమనెడి మగువ యెడల

                   ప్రేమమర్మమెరిగి ప్రియముజూపు మనసు

                   దొంగ కానివాడె దున్నపోతు

మూడవ పూరణ -   యం.వి. సుమలత

ఆ.వె||    మాయ దూడ మదిని మాధవు కొల్లగ

దొంగ. కాని, వాడు దున్నపొతు

మర్మ మెల్ల తెలిసి మదియించి వేయగ

దొంగ క్రూలె, వాడె దున్నపొతు

కం||     జోరుగ పెరిగెడి కాయపు

భారము వలదని తలంచి బాగుగ చాలా

మారులు జాలీ గాను షి

కారులు వుంటె నడకల కసరత్తు యగున్

నాల్గవ పూరణ -  మణి శాస్త్రి, టెక్సాస్

కం||     నారుల మన్నన జూడని

                   దారుల పయనించు దుష్ట దానవ చేష్టల్

                   తీరుగ పరువను దురహం

                   కారులు ఉంటే నడకల కసరత్తుయగున్.

ఆ. వె.|| మనసు దోచిన దొర మగనిగా భావించి

                   బ్రతుకు నామె అతడె భర్త యనుచు

                   దొరతనాలె భువిని దొంగ తనములెల్ల

                   దొంగ కాని వాడు దున్నపోతు

ఐదవ పూరణ- జగన్నాథ రావ్  కె.ఎల్

ఆ.వె.||   దోవ కాచి ధనము దోచుకుతినువాడు

                   దొంగ, కాని,  వాడు దున్నపోతు

                   చాల ధనము మింగి  జామాత కట్నము

                   చాలదనుచు చెయ్యి చాపినాడు

కం.||     కోరలు చాచిన మాంద్యం

                   కారణముగ భారమయ్యె కారు ప్రయాణం

                   కారులతో పని లేని షి

                   కారులు ఉంటే నడకల కసరత్తు యగున్

ఆరవ పూరణ - తల్లాప్రగడ రావు

కం||     కోరిన సీయెం (CM) మాయము!

జారుతు పేలిన విమాన జాడయె లేదా?

తీరుగ వెదకని మన అధి

కారులు ఉంటే నడకల కసరత్తు యగున్

ఆ.వె||  బుంగమూతిపెట్టె తింగరోడు యొకడు

చేయుకొద్ది పనిని చేయ మనగ!

చేయువానిచేతె చేయించరా? పని

దొంగ కాని వాడు దున్నపోతె!