Sujanaranjani
           
  కబుర్లు  
  జ్వాలా గారి శీర్షిక
 

    బాంకాక్లోని గ్రాండ్ పాలెస్, ఎమరాల్డ్ బుద్ధ, వాట్ అరుణ్, వాట్ ఫో బౌద్ధ దేవాలయాలు

 
 

రచన : వనం జ్వాలా నరసింహారావు

 
 

సింగపూర్‌లో వున్నప్పుడు, కాంబోడియాలోని సయాం రీప్‍కు వెళ్లొచ్చిన తరువాత, థాయ్‍లాండ్ రాజధాని నగరం బాంకాక్ వెళ్లాలని ఆలోచన చేశాం. అనుకున్న ప్రకారం సింగపూర్ నుంచి టైగర్ ఎయిర్‌లైన్స్ లో ప్రయాణం చేసి, బాంకాక్ అంతర్జాతీయ విమానాశ్రయం "సువర్ణభూమి" కి సెప్టెంబర్ 8, 2012 న చేరుకున్నాం. బాంకాక్‍లోని రెండు అంతర్జాతీయ విమానాశ్రయాలలో ఇదొకటి. ఆసియా ఖండంలో ప్రాముఖ్యత సంతరించుకున్న ఈ విమానాశ్రయాన్ని జాన్ ఆర్కిటెక్టులకు చెందిన హెల్మెట్ జాన్ డిజైన్ చేశాడు. విశాలమైన భూమిపై నీరుంటే ఎలా వుంటుందో ఊహించుకునే రీతిలో, ఈ విమానాశ్రయం ఒక ఓడలాగా వుండే తరహాలో డిజైన్ చేశాడు జాన్. సువర్ణభూమిలోకి అడుగిడుతూనే మనకు కనిపించే అద్భుత దృశ్యం భారతీయ హిందువుల పురాణాలలోని సముద్ర మధనం. దేవతలు, రాక్షసులు ఉమ్మడిగా చెరోవైపున వాసుకిని కవ్వంగా చేసుకుని అమృతం కొరకు సముద్ర మధనం చేస్తున్న దృశ్యాన్ని చక్కగా అమర్చారక్కడ.  

బాంకాక్ అంతర్జాతీయ విమానాశ్రయం "సువర్ణభూమి"

థాయ్‍లాండ్ కు వెళ్లే భారతీయులకు విమానాశ్రయంలోనే వీసా పొందే ఏర్పాటుంది. ఐదారు నిమిషాలలోనే ఆ తతంగం ఐపోయింది. విమానాశ్రయం నుంచి నేరుగాముందుగానే రిజర్వ్ చేయించుకున్న "అనంతార బాంకాక్ రివర్ సైడ్ రిసార్ట్" హోటెల్‍కు, కారులో చేరుకున్నాం. చక్కటి విశాలమైన బాంకాక్ రోడ్లు ఎప్పుడూ బిజీగానే, ట్రాఫిక్ తో కనిపించాయి. దాదాపు ప్రతి రోడ్డు పేరు, ఆ దేశం రాజు "రాముడు" పేరు మీదే వున్నాయి. మొదటి రాముడి రోడ్డు అని, లేదా రెండవ రాముడి రోడ్డని, అలా ఇప్పటి తొమ్మిదవ రాముడి పేరు వరకూ వున్నాయి. చాలా వీధుల పేర్లు సంస్కృత భాషకు దగ్గరగా, థాయ్ భాషకు అనుగుణంగా అనిపించాయి. బాంకాక్ నగరంలోని సుప్రసిద్ధ " ఛావో ఫ్రాయా" నది ఒడ్డున, అతి వైభోగంగా, రకరకాల చెట్లతో అలరారే హోటెల్ మేం దిగిన అనంతార బాంకాక్ రివర్ సైడ్ రిసార్ట్. నది ఒడ్డున కూర్చుంటే అలా పొద్దు తెలవకుండానే గడిచి పోయేది. హోటెల్ నుంచి నదివైపు పోయే మార్గంలో ఎప్పటిదో పాతకాలం నాటి "ఎద్దుల బండి" కనిపించింది. పాత రోజుల నాటి వస్తువులను అలా భద్ర పరిచారు ఆ హోటెల్ వారు.

 

అనంతార బాంకాక్ రివర్ సైడ్ రిసార్ట్- పాతకాలం నాటి "ఎద్దుల బండి"

గతంలో "సయాం" గాను, ప్రస్తుతం "థాయ్‍లాండ్ రాజ్యం" గాను పిలవబడుతున్న థాయ్‍లాండ్, ఇండో చైనా నట్టనడిమధ్యన వున్న ఆగ్నేసియా దేశం. నైరుతి దిశగా, అండమాన్ సాగర ఒడ్డున భారత దేశం కూడా థాయ్‍లాండ్ దేశానికి ఒకవైపు సరిహద్దు ప్రాంతమే. 1946 నుండి థాయ్‍లాండ్ రాజుగా వ్యవహరిస్తున్న తొమ్మిదవ రాముడు, ప్రపంచంలోనే అత్యంత ఎక్కువ కాలం దేశాధినేతగా వున్న వ్యక్తిగా గుర్తింపు పొందాడు. ఆరున్నర కోట్ల జనాభా వున్న థాయ్‍లాండ్ రాజధాని నగరం బాంకాక్ ఆ దేశం మొత్తానికి రాజకీయంగా, వాణిజ్యపరంగా, పారిశ్రామికంగా కేంద్ర బిందువు. ఆగ్నేసియాలోని ఇతర దేశాల తరహాలోనే, థాయ్‍లాండ్ కూడా, భారతీయ సంస్కృతీ-సాంప్రదాయాలకు, మతాలకు ప్రభావితమయింది. శతాబ్దాల అసలు-సిసలైన రాచరిక పాలన నుంచి, 1932 నాటి రక్తరహిత విప్లవం ఫలితంగా, అలనాటి రాజు ప్రజాధిపోక్, ఆ దేశ ప్రజలకు విముక్తి ప్రసాదించి, రాజ్యాంగబద్ధమైన ప్రభుత్వ ఏర్పాటుకు నాంది పలికాడు. ఇక ఇప్పుడు రాచరిక వ్యవస్థ కేవలం నామ మాత్రమే! రెండవ ప్రపంచ యుద్ధ కాలంలో, జపాన్ దాడికి గురైన థాయ్‍లాండ్, ఆ దేశంతో సైనిక ఒప్పందం కుదుర్చుకుంది. దరిమిలా, అమెరికా, ఇంగ్లాండ్ దేశాలపై యుద్ధం ప్రకటించింది. కాకపోతే, యుద్ధం ఆగిపోయిన అనంతరం, అమెరికా మిత్ర దేశంగా మారిపోయింది. అడపదడప రాజకీయ ఆటుపోట్లకు గురైన థాయ్‍లాండ్, 1980 నాటికల్లా, ఒక ప్రజాస్వామ్య దేశంగా స్థిరపడింది. రాజ్యాంగ బద్ధమైన రాచరిక ప్రజాస్వామ్య పాలన కింద వుంది ప్రస్తుతం థాయ్‍లాండ్. ఎన్నికైన ప్రధాని, వారసత్వ మొనార్క్ ల పాలనలో ప్రభుత్వం కొనసాగుతోందిప్పుడు. కార్యనిర్వాహక వ్యవస్థకు, చట్ట సభల వ్యవస్థకు అతీతంగా స్వతంత్ర న్యాయ వ్యవస్థ వ్యవహరిస్తుందీ దేశంలో.

రాజధాని బాంకాక్ థాయ్‍లాండ్ దేశంలోని పెద్ద నగరం. కోటి మంది జనాభా కలిగిన బాంకాక్‍ను థాయ్ భాషలో "దేవతల నగరం" గా పిలుస్తారు. 15 వ శతాబ్దంలో, అయుధ్య రాజ్యంలో, ఛావో ఫ్రాయా నది ఒడ్డున వున్న ఒక చిన్న వాణిజ్య కేంద్రం బాంకాక్. కాలక్రమేణా పెద్ద నగరంగా మార్పు చెందింది. ప్రాచీన కాలం నాటి బాంకాక్ పేరులో రెండు భారతీయ భాషలు-పాళి, సంస్కృతం-వున్నాయి. ఆ భాషలలో బాంకాక్‍ను, "క్రన్-దేవ మహానగర అమరరతనకొసింద్ర మహీంద్రాయుధ్య మహాతిలకభవ నవరతన రాజధాని పురీ రమ్య ఉత్తమరాజనివేసన మహా స్థాన అమరవిమాన అవతారస్థిత్య శక్రస్దత్తియ విష్ణు కర్మ ప్రసిద్ధి" అని అంటారు. "దేవతల నగరం, గొప్ప నగరం, అజరామరమైన మణి హార నగరం, జయించనలవికాని దేవేంద్రుడి నగరం, నవరత్నాలతో కూడిన యావత్ ప్రపంచానికే అద్భుతమైన రాజధాని నగరం, ఆనందమైన నగరం, అత్యద్భుతమైన రాజప్రాసాదం కలిగిన మహానగరం, విష్ణు కర్మ నిర్మించి ఇంద్రుడిచే ఇవ్వబడిన మహానగరం" అని దీనర్ధం. థాయ్‍లాండ్-బాంకాక్ పాఠశాల విద్యార్థులకు చిన్నప్పుడే ఈ పూర్తిపేరును కంఠతా నేర్పుతారిక్కడ. ప్రపంచంలో అత్యంత పొడవైన పేరు కలిగిన నగరంగా గిన్నీస్ ప్రపంచ రికార్డులలో ఇది నమోదైంది. చారిత్రాత్మక "గ్రాండ్ పాలెస్", "వాట్ అరుణ్", "వాట్ ఫో" బాంకాక్‍లోని చూడతగ్గ పర్యాటక స్థలాలో ముఖ్యమైనవి. ఏడాది పొడుగూ, పర్యాటకులు అధిక సంఖ్యలో  వచ్చే నగరాలలో, లండన్ నగరం తరువాత స్థానం బాంకాక్‍దే.  

         పడవను అద్దెకు తీసుకుని, ఛావో ఫ్రాయా నదిలో అరగంట ప్రయాణం

బాంకాక్ చేరుకున్న మొదటి రోజు, ఒక పడవను అద్దెకు తీసుకుని, ఛావో ఫ్రాయా నదిలో అరగంట ప్రయాణం చేసి, అరుణ్ వాట్ దేవాలయానికి చేరుకున్నాం. నదికి పశ్చిమ ఒడ్డున వున్న ఈ బౌద్ధ (వాట్) దేవాలయాన్ని, "సూర్యోదయ దేవాలయం" అని కూడా పిలుస్తారు. థాయ్‍లాండ్‍లో అత్యంత ప్రాముఖ్యత సంతరించుకున్న ప్రదేశాలలో ఒకటైన ఈ వాట్, భారతీయుల ఆరాధ్య దైవమైన "సూర్యుడు" పేరు మీద నిర్మించారట. సూర్యోదయం సమయాన, ఆ కాంతి దేవాలయ శిఖరంపై పడి, ఇంద్ర ధనస్సు ఆకృతిలో రంగులు కనిపిస్తాయిక్కడ. అవి కనిపించినప్పుడు ఒక దేవత అక్కడ తిరుగాడుతున్నదా అన్న భ్రమ కలుగుతుంది. అందుకే అరుణ్ వాట్ అని దీన్ని పిలుస్తారు. దేవాలయ సముదాయంలో వున్న కేంద్ర శిఖరం దీని ప్రత్యేక ఆకర్షణ. చక్కటి ఆకృతులలో, అత్యంత ఆకర్షణీయంగా, వివిధ భంగిమలో చెక్కబడి, పోర్సిలీన్ కింద కప్పబడిన బొమ్మలు కనిపిస్తాయిక్కడ. ఖ్మేర్ రాజ్యంలో, హిందు-బౌద్ధ దేవాలయాలలో ఈ చెక్కడాలు సర్వసాధారణంగా వుండేవే. అయుధ్య రాజ్యంలో, థాయ్‍లాండ్‍లో కూడా, బౌద్ధ దేవాలయాలు నిర్మించినప్పుడు, ఇదే తరహా ఆర్కిటెక్చర్‌ను వాడకంలోకి తెచ్చారు. ఎత్తైన ఈ శిఖరాలనే స్థూపాలని, పగోడాలని, ప్రాంగ్‍లని ఇక్కడ పిలుస్తారు. థాయ్‍లాండ్‍లో, ప్రముఖ బౌద్ధ దేవాలయాలన్నింటిలో ఇవి కనిపిస్తాయి. ప్రధాన "ప్రాంగ్" ఎత్తును ఇంతవరకు ఎవరూ సరిగ్గా నిర్ధారించలేదు. 219-282 అడుగుల మధ్య వుండవచ్చని అంచనా. ప్రధాన ప్రాంగ్ మూలలలో మరో నాలుగు చిన్న పగోడాలున్నాయి. సముద్రంలో దొరికే ముత్యపు చిప్పలతో, పోర్సిలీన్ ముక్కలతో ఈ పగోడాలను అలంకరించారు. దేవాలయంలోని ప్రధాన బుద్ధ విగ్రహాన్ని స్వయంగా అలనాటి రాజు రెండవ రాముడు తీర్చి దిద్దాడని అంటారు. ఆ విగ్రహం కిందనే, ఆయన చితాభస్మాన్ని పాతిపెట్టారట. రకరకాల దేవతల, కోతుల బొమ్మలతో రూపుదిద్దుకోబడిన ఆకృతులు పగోడాకు అన్ని వైపులా కనిపిస్తాయి. తిరుపతి మోకాళ్ల పర్వతం మోస్తారు ఎత్తైన మెట్లను ఎక్కి పోగలిగితే, ప్రధాన స్థూపం అంచుకు చేరుకోవచ్చు. ఈ నిర్మాణం కింది భాగం చుట్టుకొలత సుమారు 234 మీటర్లుంటుంది.  

అరుణ్ వాట్-"సూర్యోదయ దేవాలయం"

ప్రధాన స్థూపం పైభాగాన ఏడు మొలకల పొడగాటి ఆయుధం అమర్చబడి వుంది. దీన్ని అక్కడి వారు, భారత దేశంలోని శివాలయాలలో కనిపించే "త్రిశూలం" తో పోలుస్తున్నారు. ఆగ్నేసియా దేశాలలోని పలు ఆలయాలలో ఇలాంటివి కనిపిస్తాయి. హిందువుల-బౌద్ధుల మత ప్రమేయమైన గుర్తుగా దీన్ని భావిస్తారిక్కడ. పగోడా-స్థూపం కింది భాగంలో, చైనా దేశపు సైనికుల, జంతువుల బొమ్మలు రక-రకాల ఆకృతిలో చిత్రించబడి వున్నాయి. రెండో అంతస్తులో ఐరావతాన్ని ఎక్కిన ఇంద్రుడి నాలుగు విగ్రహాలు కనిపిస్తాయి. ప్రధాన పగోడా మూడు అంతస్తులు, సృష్టి-స్థితి-లయల గుర్తుగా చెప్పుకుంటారక్కడ.

ప్రధాన స్థూపం పైభాగాన ఏడు మొలకల పొడగాటి ఆయుధం

మరుసటి రోజు ఉదయం వాట్ ఫో చూడడానికి వెళ్లాం. "నిదురిస్తున్న బుద్ధుడి దేవాలయం" గా కూడా పిలువబడే వాట్ ఫో, చారిత్రాత్మక గ్రాండ్ పాలెస్ పక్కనే వుంటుంది. ఇక్కడి నుంచి మేం అక్కడికి వెళ్లాం. సాంప్రదాయ బద్ధంగా-అనాదిగా ఆచరణలో వున్న "థాయ్‍లాండ్ మసాజ్" జన్మస్థలంగా కూడా ఈ దేవాలయానికి గుర్తింపు వుంది. బుద్ధుడు నివసించిన భారతదేశంలోని మొనాస్ట్రీ పేరు మీద వాట్ ఫో నిర్మించారు. బుద్ధుడికి జ్ఞానోదయం కలిగిన భారతదేశంలోని బోధి వృక్షానికి చెందిన ఒక మొక్కను తెచ్చి ఇక్కడి దేవాలయ ప్రాంగణంలోని స్థలంలో నాటగా ఇప్పుడది పెద్ద చెట్టయింది. 80,000 చదరపు మీటర్ల విస్తీర్ణంలో వ్యాపించి వున్న ఈ దేవాలయ ప్రాంగణంలోని వాట్ ఫో, బాంకాక్‍లోని అత్యంత పురాతనమైన-అతి పెద్దదైన వాట్‍గా చెప్పుకుంటారు. ప్రపంచంలోనే అత్యంత పొడవైనదిగా-160 అడుగుల నిడివిగల నిదురిస్తున్న బుద్ధుడి విగ్రహంతో పాటు, వేయికిపైగా బుద్ధుడి ఒకే రకమైన విగ్రహాల నిలయం వాట్ ఫో దేవాలయం. వాట్ ఫో రెండు భాగాలుగా-తూర్పు, పడమరలుగా పోతున్న రోడ్డుకు ఇరువైపులా, వుంటుంది. ఉత్తరపు వైపు "రిక్లయినింగ్ బుద్ధ దేవాలయం", మసాజ్ విద్యాలయం వున్నాయి. దక్షిణం వైపు, బౌద్ధ బిక్షువులుండే నివాస స్థలం వుంది. దేవాలయ ముందు భాగంలో 91 చిన్నా-పెద్దా స్థూపాలున్నాయి. ఒక ప్రధాన ప్రార్థనా మందిరం, నాలుగు విహారాలు-హాల్స్ వున్నాయి. చిన్న సైజులో వున్న 71 స్థూపాల కింద రాజుల కుటుంబాలకు చెందిన వారి చితాభస్మాలున్నాయి. మిగిలిన 21 పెద్ద స్థూపాల కింద బుద్ధుడి చితాభస్మం వుంది. నాలుగు స్థూపాలు, నలుగురు చక్రి రాజులకు అంకితం చేశారు. రాతితో తయారుచేసిన భారీ చైనా దేశపు రాక్షస విగ్రహాల రక్షణలో, దేవాలయానికి చెందిన పదహారు గేట్లున్నాయి. ఐదవ రాజు రాముడు కొని తెచ్చిన 1200 బుద్ధ విగ్రహాలలో 400 బయట ఆవరణలో ఒకదాని వెంట మరొకటి పేర్చబడి-కూర్చబడి వున్నాయి. అన్ని విగ్రహాలు కంచుతో చేసినవే ఐనా, అందులో ఓ పాతిక విగ్రహాలు బంగారంతో తయారైనవని, అవేవో ఎవరికీ తెలియని విధంగా అక్కడక్కడా వున్నాయని చెప్పుకుంటారు. రామాయణ గాధల నుంచి విశేషాలతో చెక్కడాలు కూడా దేవాలయ గోడల మీద కనిపిస్తాయి.

ఐదవ రాజు రాముడు కొని తెచ్చిన 1200 బుద్ధ విగ్రహాలలో

400 బయట ఆవరణలో ఒకదాని వెంట మరొకటి పేర్చబడి-కూర్చబడి

నిదురిస్తున్న ఆకారంలో వున్న బుద్ధుడి విగ్రహం 15 మీటర్ల ఎత్తు, 43 మీటర్ల పొడ వుంటుంది. కుడి చేయి కింద, రెండు తలగడలపైన, తల పెట్టుకుని విశ్రాంతి తీసుకుంటున్న భంగిమలో వుంటుంది. ముత్యాలు పొదిగిన పెట్టెలపై, విగ్రహం 3 మీటర్ల ఎత్తు-4.5 మీటర్ల పొడవున్న విగ్రహం కాళ్లుంటాయి. విగ్రహంపైన థాయ్‍లాండ్ అధికార ప్రతినిధిగా ఏడంతస్తుల గొడుగు అమర్చబడి వుంటుంది. పక్క కారిడార్‌లో బుద్ధుడి గుణ-గణాలుగా చెప్పుకునే 108 చిప్పలుంటాయి. అక్కడ నివసిస్తున్న బౌద్ధ భిక్షువుల పోషణ కొరకు, సందర్శకులు తమకు తోచిన విరాళాలను ఆ చిప్పల్లో వేస్తారు. అలా చేయడం తమకు మంచి జరుగుతుందని కూడా వీరి నమ్మకం.

అరుణ్ వాట్, వాట్ ఫో బౌద్ధ దేవాలయాల తరువాత బాంకాక్‍లో తప్పకుండా చూడాల్సినవి గ్రాండ్ పాలెస్, ఎమరాల్డ్ బుద్ధ దేవాలయం. మేం బాంకాక్ వెళ్లిన మర్నాడు ఆ రెంటినీ చూశాం. థాయ్ భాషలో "ఫ్రా బోరాం మహా రచ్చ వాంగ్" అని పిలువబడే ఈ అద్భుత రాజప్రాసాదం బాంకాక్ నగరం నడి బొడ్డులో వుంటుంది. 1782 నుండి 143 సంవత్సరాల పాటు థాయ్‍లాండ్ (ఒకప్పటి సయాం) చక్రవర్తుల అధికారిక నివాసంగా వుండేదీ గ్రాండ్ పాలెస్. ఈ రాజప్రాసాదం నుంచే రాజు, ఆయన కోర్ట్, ఆయన ప్రభుత్వం 1925 వరకు పనిచేస్తుండేవి. ప్రస్తుత సార్వభౌమాధికారి-చక్రవర్తి, తొమ్మిదవ రాముడు, భూమి బల్ అదుల్యతేజ్, గ్రాండ్ పాలెస్‍లో కాకుండా, మరో చోట-చిత్రాలడ భవనంలో నివాసముంటున్నాడు. ఐనప్పటికీ గ్రాండ్ పాలస్‍ను పలు అధికారిక కార్యక్రమాలకు వినియోగించుకుంటున్నారు. ఏటా, ఎన్నో రాచరిక కార్యక్రమాలు, ప్రభుత్వ కార్యక్రమాలు, ఈ భవనం నాలుగు గోడల మధ్యే జరుగుతాయి. విచిత్రంగా, ఈ గ్రాండ్ పాలెస్ సముదాయపు విశాలమైన ఆవరణలో, సుమారు వేయికి పైగా, భారతదేశంలో విరివిగా పెరిగే చింత చెట్లు కనిపిస్తాయి. తోటమాలీల ద్వారా చక్కగా-నీట్‍గా కత్తిరించి చూడ ముచ్చటగా పెంచుతున్నారు.

               15 మీటర్ల ఎత్తు, 43 మీటర్ల పొడవున్న బుద్ధుడి విగ్రహం (రిక్లైనింగ్ బుద్ధ) 

ముత్యాలు పొదిగిన పెట్టెలపై 3 మీటర్ల ఎత్తు-4.5 మీటర్ల పొడవున్న విగ్రహం కాళ్లు

అప్పటి తన రాజధాని నగరం థోన్‍బూరి నుంచి బాంకాక్ మారిన దరిమిలా, నాటి చక్రవర్తి-మొదటి రాముడు, చక్రి రాజవంశం స్థాపకుడు, రాజా బుద్ధ యోడ్ఫా చులలోక్ ఉత్తర్వుల మేరకు మే నెల 6, 1782 న ఈ రాజప్రాసాదం నిర్మాణము ఆరంభమైంది. ఆయన తదనంతరం ఒకరి వెంట మరొకరు, ముఖ్యంగా ఐదవ రాముడు రాజా చూలాలోంకార్న్ పాలనలో, మరెన్నో నిర్మాణాలను ఈ రాజప్రాసాదానికి అనుబంధంగా నిర్మించుకుంటూ పోయారు. వారసత్వ చక్రవర్తుల సార్వభౌమాధికారానికి 1932 లో స్వస్తి చెప్పిన తరువాత, అన్ని రకాల ప్రభుత్వ సంస్థలు ఇక్కడి నుంచి బయటకు కదిలించారు. నాలుగు వైపులా నాలుగు భారీ ప్రహారీ గోడల మధ్య, సుమారు 218,400 చదరపు మీటర్ల (2,351,000 చదరపు అడుగుల) విస్తీర్ణంలో వ్యాపించి వున్న ఈ భవన సముదాయం దీర్ఘ చతురస్రాకారంలో కనిపిస్తుంది.  

       థాయ్‍లాండ్ (ఒకప్పటి సయాం) చక్రవర్తుల అధికారిక నివాసంగా వుండే గ్రాండ్ పాలెస్

వేయికి పైగా పెరిగిన చింత చెట్లు-చక్కగా-నీట్‍గా కత్తిరించి చూడ ముచ్చటగా 

నగరం నడిబొడ్డు నుండి ప్రవహిస్తున్న ఛావో ఫ్రాయా నది ఒడ్డున వుందీ భవనం. గ్రాండ్ పాలెస్ నిండా అనేక భవనాలు, కోర్ట్ హాల్స్, కోర్ట్ యార్డులు, పచ్చిక బయళ్లు, ఖాళీ మైదానాలు, రోడ్లు, తోటలు కనిపిస్తాయి. సుమారు రెండు వందల సంవత్సరాల పాటు అనేకమంది రాజుల కాలంలో అనేకానేక నిర్మాణాలు, ఎవరికి ఇష్టమొచ్చిన రీతిలో వారు చేయడం వల్ల, ఒక క్రమపద్ధతిలో లేవేమో అనిపిస్తుంది చూసేవారికి. పలు విభాగాలుగా వున్న గ్రాండ్ పాలెస్‍లో ప్రధానంగా కనిపించేవి ఎమరాల్డ్ బుద్ధ దేవాలయం, ఔటర్ కోర్ట్ హాల్, పలు ప్రభుత్వ భవనాలు, మిడిల్ కోర్ట్, ఇన్నర్ కోర్ట్. చట్ట ప్రకారం, నిబంధనల ప్రకారం ఇవన్నీ వాటి కార్యక్రమాలు అవి చేసుకుంటూ పోతాయి. భవనం లోనికి అనుమతి లేకపోయినా పర్యాటకులు భవన సముదాయం లోని విశాలమైన బహిరంగ ప్రదేశంలో తిరగడానికి వీలుంది. విదేశీ-స్వదేశీ పర్యాటకులను అమితంగా ఆకర్షించే గ్రాండ్ పాలెస్ థాయ్‍లాండ్ ప్రధాన పర్యాటక స్థలం.

 

గ్రాండ్ పాలెస్ ఆవరణలోని ఎమరాల్డ్ బుద్ధ దేవాలయం

గ్రాండ్ పాలెస్ ఆవరణలోనే వుంది ఎమరాల్డ్ బుద్ధ దేవాలయం. థాయ్ భాషలో "ఫ్రా పుత్థ మహా మణి రత్తన పతిమకాన్" అని పిలువబడే ఎమరాల్డ్ బుద్ధ దేవాలయం, థాయ్‍లాండ్ రాజ్యానికి ఒక రకమైన రక్షగా భావిస్తారు. అన్ని వేళలా థాయ్‍లాండ్‍ను కాపాడేది ఎమరాల్డ్ బుద్ధ విగ్రహం. ఆకుపచ్చని జేడ్ రాయితో తయారు చేయబడిన ఈ బుద్ధ విగ్రహం సుమారు 45 సెంటీమీటర్ల పొడవుండి, కూర్చునే ఆకారంలో కనిపిస్తుంది. విగ్రహం చుట్టూ బంగారు వస్త్రం కప్పబడి వుంటుంది. ఆ విగ్రహాన్ని ఎమరాల్డ్ బుద్ధ దేవాలయంలో అమర్చారు. ఎమరాల్డ్ బుద్ధ విగ్రహం తయారీ నుంచి, అది బాంకాక్ నగరం చేరుకునేంతవరకూ జరిగిన విషయాలను కథలు-కథలుగా చెప్పుకుంటారక్కడ. క్రీస్తు పూర్వం 43 లో, భారత దేశంలోని ఇప్పటి పాట్నా-ఒక నాటి పాటలీపుత్రంలో నాగసేన అనే మహానుభావుడు సృష్టించాడట ఎమరాల్డ్ బుద్ధ విగ్రహాన్ని. అప్పట్లో జరగవచ్చని భావించిన ఒక అంతర్యుద్ధం బారి నుండి ఎమరాల్డ్ బుద్ధను కాపాడడానికి, మూడు వందల సంవత్సరాల పాటు పాటలీపుత్రంలో నే వున్న దానిని, ఎవరో ఒకరు శ్రీలంకకు తరలించారట. తన దేశంలో బౌద్ధ మతాన్ని విరివిగా ప్రచారంలో తెచ్చే ఉద్దేశంతో, అప్పటి బర్మా చక్రవర్తి రాజా అనురుథ్, ఆ విగ్రహాన్ని ఇవ్వమని అడిగేందుకు, ఒక ప్రతినిధి బృందాన్ని శ్రీలంకకు 457 సంవత్సరంలో పంపాడు. ఆయన అభ్యర్థనను శ్రీలంక ప్రభుత్వం మన్నించినప్పటికీ, విగ్రహాన్ని తీసుకు వస్తున్న నౌక దారి తప్పి కాంబోడియాకు చేరింది. ఆ తరువాత లభ్యమైన చారిత్రక ఆధారాల ప్రకారం, 1434 లో, ఉత్తర థాయ్‍లాండ్‍లో ఆ విగ్రహం బయటపడింది. థాయ్‍లాండ్ దేశంలోని లాంపాంగ్‍లో అది 1468 వరకుంది. అక్కడ నుంచి థాయ్‍లాండ్ లోని మరో రెండు మూడు ప్రదేశాలకు మార్చబడిన తరువాత మార్చ్ 22, 1784 న ఇప్పుడుంటున్న ఎమరాల్డ్ బుద్ధ దేవాలయానికి మార్చాడు అప్పటి ఒకటవ రాముడు రాజా ఛావో ఫ్రాయా చక్రి. అప్పటి నుంచి ఇప్పటి దాకా ఆ విగ్రహం ఇక్కడే పూజలందుకుంటుంది.  

గరుడ-నాగ సంవాదంతో వున్న విగ్రహాలు

ఎమరాల్డ్ బుద్ధ దేవాలయం మొత్తం బంగారంతో మెరిసిపోతుంటుంది. విగ్రహం చుట్టూతా బంగారు వస్త్రాలు చుట్టబడి వుంటాయి. బంగారు వస్త్రాలు మూడు రకాలుగా వుంటాయి. ఈ మూడు రకాల వస్త్రాలు, థాయ్‍లాండ్ ఆచారం ప్రకారం, మూడు రుతువులలో, ఒక్కో రుతువులో ఒక్కొక్కటిగా చొప్పున మారుస్తుంటారు. మార్చడానికి థాయ్‍లాండ్ రాజు కాని, రాజు సంబంధీకులు-బంధువులు కాని తప్పని సరిగా రావాలి. ఆ మూడు రుతువులు థాయ్‍లాండ్ ఆచారం ప్రకారం మార్చ్-ఏప్రిల్ నెలలు కొంచెం అటు-ఇటుగా కాని, జులై-ఆగస్ట్ లో కాని, నవంబర్-డిసెంబర్ లో కాని వస్తాయి. ఆ మూడు, ఒకటి ఎండా కాలం, మరొకటి వర్షాకాలం, ఇంకొకటి శీతాకాలం. కప్పబడని మిగిలిన రెండు రకాల బంగారు వస్త్రాలను, సందర్శకులు చూసేందుకు వీలుగా గ్రాండ్ పాలెస్‍లోని మ్యూజియంలో వుంచుతారు. మేం వెళ్లిన రోజున, ఈ ఏడాది వర్షాకాలం మార్చాల్సిన వస్త్రాలను ఎమరాల్డ్ బుద్ధకు సమర్పించేందుకు, రాజు గారి మనుమరాలు ప్రిన్సెస్ శైలి వచ్చింది. ఆమె రావడం-పోవడం అంతా సాదా-సీదాగా, ఏ హంగూ-ఆర్భాటం లేకుండా, సందర్శకులకు ఎలాంటి ఇబ్బంది కలగకుండా జరిగింది. ఎమరాల్డ్ బుద్ధకు, బౌద్ధ దేవాలయాలకు వుండాల్సిన అన్ని హంగులున్నప్పటికీ, బౌద్ధ భిక్షువులు వుండడానికి నివాస స్థలం లేదక్కడ. పూర్తి థాయ్ ఆర్కిటెక్చర్‍తో నిర్మించిన ఈ దేవాలయం, గ్రాండ్ పాలెస్ ఆవిర్భావానికి, ఆ మాటకొస్తే, బాంకాక్ ఆవిర్భావానికి సమీప సంబంధం వుందనాలి. 

ఎమరాల్డ్ బుద్ధ

ఔటర్ కోర్ట్ గ్రాండ్ పాలెస్‍కు వాయువ్యంగా వుంటుంది. అందులోనే ఒక చిన్న మ్యూజియం కూడా వుంది. అతి పెద్దదైన మిడిల్ కోర్ట్, గ్రాండ్ పాలెస్‍కు మధ్య భాగంలో వుంటుంది. ఇక్కడే రాచ కుటుంబానికి చెందిన ప్రముఖుల నివాస స్థలాలు, ఇతర భవనాలు వున్నాయి. ఇందులోనే "కైలాస గిరి" వుంది. ఐదవ రాజు రాముడి కాలంలో, శివుడి నివాస స్థానమైన కైలాసంను పోలిన ఈ నిర్మాణం జరిగింది. దక్షిణ భాగాన ఇన్నర్ కోర్ట్ వుంది. గ్రాండ్ పాలస్‍ను చూడకుండా పోవడం అంటే బాంకాక్‍ను చూడకుండా పోయినట్లే! గ్రాండ్ పాలెస్ లోకి వెళ్లాలంటే 400 థాయ్ భట్లతో టికెట్ కొనుక్కోవాలి. లోపలికి వెళ్లడానికి డ్రెస్ కోడ్ వుంది. శరీరం మొత్తం కప్పబడే విధంగా దుస్తులు ధరించాలి. పొట్టి దుస్తులు ధరించరాదు. బూట్లు-సాక్స్ వేసుకోవాలి.

చివరగా ఒక ఇండియన్ రెస్టారెంట్‌లో భోజనం చేసి హోటెల్ గదికి చేరుకున్నాం. మర్నాడు బయలుదేరి సింగపూర్‌కు తిరిగొచ్చాం.

 
 
 
 

 

మీ అభిప్రాయాలు, సలహాలు మాకెంతో అవసరం. దయచేసి మీ అభిప్రాయం ఈ క్రింది పెట్టెలో తెలపండి.
(Please leave your opinion here)

పేరు
ఇమెయిల్
ప్రదేశం 
సందేశం
 
 






సుజనరంజని మాసపత్రిక ఉచితంగా మీ ఇమెయిల్ కి పంపాలంటే వివరాలు కింది బాక్స్‌లో టైపు చేసి
సబ్‍స్క్రైబ్ బటన్ నొక్కగలరు.

 

     

 

గమనిక: మీ విద్యుల్లేఖా చిరునామా ఎవరితోనూ పంచుకోము; అనవసర టపాలతో మిమ్మలను వేధించము. 
   మీ అభిప్రాయాలను క్లుప్తంగానూ, సందర్భోచితంగానూ తెలుపవలసినది.
(Note: Emails will not be shared to outsiders or used for any unsolicited purposes. Please keep comments relevant.)

 

 
Copyright ® 2001-2012 SiliconAndhra. All Rights Reserved.
   సర్వ హక్కులూ సిలికానాంధ్ర సంస్థకు మరియు ఆయా రచయితలకు మాత్రమే.                                                                                                Site Design: Krishna, Hyd, Agnatech