సమస్యాపూరణం:
ఈ క్రింది "సమస్యని" అంటే ఆ వ్యాక్యన్ని యదాతధంగా ఒక పద్యంలోకి ఇమిడ్చి వాడుకుంటూ రాయాలి. ఒకవేళ పద్యం కాకపోయినా ఒక కవిత రాసినా కూడా వాటిని మేము సగౌరవంగా స్వీకరిస్తాము.
మీ జవాబులు ఈ మెయిల్(rao@infoyogi.com) ద్వారా కాని ఫాక్స్ ద్వారా కానీ : 408-516-8945 మాకు మార్చి 20వ తారీఖు లోపల పంపించండి. ఉత్తమ పూరణలను తరువాయి సంచికలో ప్రచురిస్తాము.
ఈ మాసం సమస్య
" ఆ.వె.//ఆడువారి మాటలర్థాలె వేరులె
క్రితమాసం సమస్య(పుల్లెల శ్యామసుందర్ గారు పంపిన ప్రశ్న)
కం: అందమె ఆనందమంచు అద్దము చూచెన్ "
ఈ సమస్యకు వచ్చిన ఉత్తమ పూరణలు ఇలా వున్నాయి.
మొదటి పూరణ - పుల్లెల శ్యామసుందర్, శాన్ హోసే, కాలిఫొర్నియా
సుందరి నేననుచునొక్క సొగసరి మహదా
నందము పొందెను అహహా
అందమె ఆనందమనుచు అద్దము చూచెన్
రెండవ పూరణ - కోరాడ ప్రకాష్, విజయనగరం
అందున ఇంతిని పొగడక అడగకనుంటే
సుందరి కోపము తెచ్చుకు
అందమె ఆనందమంచు అద్దము చూసెన్
మూడవ పూరణ - తల్లాప్రగడ, శాన్ హోసే
సందేహమువలదు! ఆమె సందు దొరికితే
అందరి అద్దములందున,
అందమె ఆనందమంచు అద్దము చూచున్
నాల్గవ పూరణ - శ్రీరాం, సిడ్నీ, ఆస్ట్రేలియా
గంధము మించిన సుగంధము లేదు
ఆనందము మించిన బంధము లేదు
అందము మించిన ఆనందము లేదు
అందమె ఆనందమంచు అద్దము చూసెన్
ఐదవ పూరణ -- మాజేటి సుమలత, బెంగళూరు
సుందరి చేరంగ నతడు చోద్కుల తోడన్
పొందుగ క్రాపును దువ్వుచు
అందమె ఆనందమంచు అద్దము చూచెన్ [స్కూటర్ అద్దము]
ఆరవ పూరణ - ఎం. వి.సి. రావు, బెంగళూరు
ముద్దుగ నుందంచు తీతి మురిపెము తోడన్
కుద్దుగ పీల్చగ విరి, మక
రందమె ఆనందమంచు అద్దము చూచెన్
ఏడవ పూరణ- సుబ్రమణ్యం బత్తల, రోచెస్టర్ హిల్ల్స్, మిచిగన్
చిగురుటాకుల మోవి పై చిరుహాస మలర
ముద్దు మోమున ముదమందు ముద్దరాలు తన
అందమె ఆనందమనుచు అద్దము చూచెన్
ఎనిమిదవ పూరణ-భోగారావ్ పప్పు
అందము యప్రకృతిలోను, అందరిలోనన్
అందము చూచుట నెరుగక
అందమె ఆనందమంచు అద్దము చూచెన్
పాఠకులనుండీ మరిన్ని మంచి పద్యాలు
- పుల్లెల శ్యామసుందర్, శాన్ హోసే, కాలిఫొర్నియా
(అందరూ పంపించండి, అందరితో పంచుకోండి)
కొత్తిమీర కారం:
పులుపు, మిర్చి, వంగ ముక్కలేసి,
పోపుజేర్చి దాన్ని పొయ్యమీదుంచితే,
కూర రుచిగనుండు నారగింప!
పెసరట్టు :
జీలకర్ర కొంత జేర్చి రుబ్బి
పెనము మీద పోయ పెసర్ట్టగునయా
తెలుసుకొనర నరుడ! తెలుగు వంట!
అల్లప్పచ్చడి :
పులుపు, తీపి, పోపు వేసి దంచి,
అట్టు ముంచితిన్న అద్భుతముగనుండు!
తెలుసుకొనర నరుడ! తెలుగు వంట!
భక్త హనుమ - తల్లాప్రగడ
సీ.// అయ్యడ వనమంత వ్రయ్యలు కొట్టగ, మేడ్పడె ఈ కోతి మేడమందు !
అయ్యారే! మేడియమైనను లేకుండ కండయండలు మెండుయుండెనంచు,
కాండమూలాలతో కంపించి ఖండించె, కండ కొవ్వున కన్నుకానకుండ!
కొండముచ్చుకిపుడీ గండర గండుడే గండరించును గాదె గండమింక!
తే.గీ.//హాల కేళి వేళందలి హాళి తోటి
హావళిగొనివచ్చినవాడ! హాలికుడవు
కావె, హారకుడవు, తుచ్చ కపివి యంచు
రావణుడు కోపగించేను రామచంద్ర!
అయ్యడ = అప్పుడు
వనమంత = అశోకవనమంతా
వ్రయ్యలు కొట్టగ= ముక్కలు కొట్టగ
మేడ్పడె = మోడుపడెను
ఈ కోతి మేడమందు!= ఈ కోతి ఆటలు లెక కొట్లాత్లందు
అయ్యారే! = ఆయ్యారే (ఆశ్చర్యము)
మేడియమైనను = ఒక బాకు లేక ఆయుధమైనా
లేకుండ = లెకుండా
కండయండలు = ఒక్క కండ అండలు
మెండు యుండె నంచు= బాగా వున్నాయికదా అని
కాండమూలాలతో = (వృక్షాలను) వేళ్లతోసహా
కంపించి = కదిలించి
ఖండించె= (లెక) విరిచాడే
కండ కొవ్వున = కాండ కావురము కాదా
కన్నుకానకుండ!= కన్నుమిన్ను చూడకుండా (చేసాడు కాదే)!
కొండముచ్చుకిపుడీ = ఈ కొండముచ్చుకి ఇప్పుడు ( కోతి అని ఈసడించుకోవడం)
గండర గండుడే = శూరులకి శూరుడైనటువంటి వాడే (రావణుడు)
గండరించును గాదె = పుట్టిస్తాడు కదా
గండమింక!= గండాలు ఇకపైన!
హాల = మద్యము లేక సుర
కేళి =ఆట (కల్లుతాగిన కోతి అనుట)
వేళందలి = (కోతి కల్లు తాగినప్పటి) వేళ నందు
హాళి తోటి= ఉత్సాహంలో కోరికలతో
హావళి గొనివచ్చినవాడ!= ఉపదృవములను తెచ్చేవాడా
హాలికుడవు కావె= నీవు వనమాలివి/రక్షకుడవు ఐనా కావే
హారకుడవు, = దోంగలా వున్నావు, లేక నాశకుడవు
తుచ్చ కపివి = ఒక్క సామాన్య కోతివి
యంచు= అని అనుచూ
రావణుడు కోపగించేను =కోపము తెచ్చుకున్నాడు ఆ రావణుడు
రామచంద్ర!= రామచంద్రుడా!
