ముందుమాట: ఈ శీర్షికతో తెలుగు పద్యంలో ఉన్న అందాన్ని, గొప్పతనాన్ని పదిమందికీ అందించి, వారినీ ఈ ప్రక్రియకు దగ్గిర చేసి, పద్యానికుండవల్సిన మర్యాదని గుర్తుచేయడమే మా సంకల్పం. మరుగు పడిన పద్యాన్ని మళ్ళీ మెరుగు పరచి, భాషను సరళీకృతం చేస్తే, పద్యాలంటే ఉన్న భయం తొలుగుతుంది. వాడుక భాషలో పద్యాలు వ్రాస్తే, అటు పద్యమూ నిలబడుతుంది, ఇటు ప్రజలకూ అర్థమవుతుంది. అందుచేత వాడుకభాషా ప్రయోగాలకు మేము ప్రాముఖ్యత ఇవ్వదలిచాము. ముందు ముందు ఈ శీర్షికను పాఠకులందరూ పాల్గునే విధంగా రూపొందిస్తాము. అలాగే మంచి పద్యాలకు భాష్యం, తాత్పర్యాలు, కూడా ప్రచురిస్తాము. అందరూ ఆనందించాలి, ఆస్వాదించాలి, ఆదరించాలి, అదే మాకు పదివేలు (డాలర్లు)!!!!

సమస్యాపూరణం:

ఈ క్రింది "సమస్యని" అంటే ఆ వ్యాక్యన్ని యదాతధంగా ఒక పద్యంలోకి ఇమిడ్చి వాడుకుంటూ రాయాలి. ఒకవేళ పద్యం కాకపోయినా ఒక కవిత రాసినా కూడా వాటిని మేము సగౌరవంగా స్వీకరిస్తాము.

మీ జవాబులు ఈ మెయిల్(rao@infoyogi.com) ద్వారా కాని ఫాక్స్ ద్వారా కానీ : 408-516-8945 మాకు జూన్ 20వ తేదీ లోగా పంపించండి. ఉత్తమ పూరణలను తరువాయి సంచికలో ప్రచురిస్తాము.

ఈ మాసం సమస్య

" ఆ.వె.|| అడవిగాచె వెన్నెలంత యిటుల?"



క్రితమాసం సమస్య

" కం.|| పలుకే బంగారమాయె పలుకుల చిలకా! "



ఈ సమస్యకు వచ్చిన ఉత్తమ పూరణలు ఇలా వున్నాయి.

మొదటి పూరణ - కృష్ణ ఆక్కులు, కుపర్టీనో, కాలిఫోర్నియ.

కం|| తెలుగు పలక తెలియని వని
తలకును డబ్బింగు చెప్పు తప్పుడు భావం
పలుకులకు డబ్బులు కురియ
పలుకే బంగారమాయె పలుకుల చిలకా

కం|| గలగల మనువుకు ముందర
పలుకుచు చిలిపిగ తిరిగిన బాలిక కులుకున్
కిలకిల నగవులు తగ్గగ
పలుకే బంగారమాయె పలుకుల చిలకా
కం|| వలపులను పంచి చెలిమిని
కలిపి మధువుల తలపులను కలిమిగ మదిలో
నిలిపి పలకవేల నిపుడు
పలుకే బంగారమాయె పలుకుల చిలకా


రెండవ పూరణ - శ్యామసుందర్ పుల్లెల, శాన్ హోసే, కాలిఫోర్నియా

కం|| పలుకుటమానెను ఐపాడ్
వలువలన మరచి ఉతకగ పాడై పోయెన్
గిలగిల లాడుతు అతడనె
"పలుకే బంగారమాయె పలుకుల చిలకా!"
కం|| గలగల వాగే కూతురు
నలుగురిలో నోరుమెదప నని కూర్చుంటే
తలకొట్టుకు పలికెనతడు
"పలుకే బంగారమాయె పలుకుల చిలకా!"


కం|| కలగక ఉన్నను చదువది
గలగల ఇంగ్లీషు వాగ కాల్సెంటర్లో
సులువుగ డబ్బులు వచ్చును,
పలుకే బంగారమాయె పలుకుల చిలకా!


మూడవ పూరణ - తల్లాప్రగడ, శాన్ హోసే, కాలిఫోర్నియ

కం|| పలుకే ఓ మంత్రము, నీ
చిలిపి నగవు తగవులైన చీల్చగలదు, నీ
పలుకుకొరకె వేచా! నీ
పలుకే బంగారమాయె పలుకుల చిలకా!


కం|| కలదొక టీవీ అక్కడ
వులకదు పలకదు! రిమోటె వున్నది గానీ
నలిగెను మోటీ చేతిలొ!
పలుకే బంగారమాయె పలుకుల చిలకా!


నాల్గవ పూరణ - శ్రీరాం, సిడ్నీ, ఆస్ట్రేలియా

కం|| అలుపుసొలుపేది నాతో
కలుపులు తీస్తు నువుపాట కలుపుతువుంటే!
పొలమున నువె లేకుంటే
పలుకే బంగారమాయె పలుకుల చిలకా


పాఠకులనుంచి మరిన్ని మంచి పద్యాలు



కృష్ణ ఆక్కులు గారు పంపినవి

కం||తిరుమలనిలయా కరుణా
కర భక్తిగ చూడరాగ కసిగా పదరా
త్వరగా యని నను త్రోసిరె
నరహరి నిన్నే తలవగ నామది నిండా


కం||ఇరుకు అలమరా లన్నను
కరుకు మనుషులన్న ప్రీతి గాదే నీకున్(లక్ష్మీ)
మురికి జనులందు ఎందుకు
కరుణ దలచవో భగవతి కలుములరాణీ


కం||కంధా గుహా (మురుగ) తమిళవా
రందురు వారే కొలిచెదరని తమిళులదై
వం నీవనిమరికావా
అందరి వేలుపు కొలువగ అందరు నిన్నే


కం||అల్లా మాలికని యనుచు
చల్లగ మమ్ము దయ చూసె చక్కని బాబా
ఉల్లం న నీవె వుండగ
తల్లీ తండ్రిగ పిలిచెద తలచెద నిన్నే


ఇంతవరకు పాఠకుల తీర్పు: Page Title
     అద్భుతం
మీమాట ఒక్క మాటలో.... Page Title
    
 Test Page

మీ అభిప్రాయాలు, సలహాలు మాకెంతో అవసరం.
దయచేసి మీ అభిప్రాయం ఈ క్రింది పెట్టెలో విస్తారంగా తెలపండి.
వచ్చే సంచికలో ప్రచురిస్తాము.
(Please leave your opinion)

పేరు(Name):

విద్యుల్లేఖ (Email):

అభిప్రాయం (Opinion):
 

గమనిక: మీ విద్యుల్లేఖా చిరునామా ఎవరితోనూ పంచుకోము; అనవసర టపాలతో మిమ్మలను వేధించము. మీ అభిప్రాయాలను క్లుప్తంగానూ, సందర్భోచితంగానూ తెలుపవలసినది.
(Note: Emails will not be shared to outsiders or used for any unsolicited purposes. Please keep comments relevant.)