Sujanaranjani
           
  శీర్షికలు  
 

భీమ శతకం - 15                                  

        

 

 - రచన : ఆచార్య వి. యల్. యస్. భీమశంకరం    

 

141.            ఈత నేర్పు తరిని ఈతపై పాఠంబు

                చెప్ప వలను లేదు గొప్పగాను,

                నేర్పు తోడ వాని నీట త్రోసిన చాలు!

                విమల సుగుణ ధామ వేము భీమ. 

142.         వయసు తోడ తెలివి పెరుగునా మనిషికి?

                పెరుగ వేమిగూడ తఱుగు గాని

                ముఖము పైన నుండు ముడుత లొక్కటి తక్క -

                విమల సుగుణ ధామ వేము భీమ.                 

143.         పుట్టినపుడు మనిషి మూర్ఖుడై పుట్టడు,

                పెరుగు నపుడు వాడు పరుల జూచి

                ఎన్ని ఏండ్లొ నేర్చి ఇట్లౌను శ్రమియించి -

                విమల సుగుణ ధామ వేము భీమ. 

144.         న్యూసు పేపరెంత నూరి మ్రింగిన గాని,

                కలుగ బోదు తెలివి ఖలున కెపుడు  -

                కాగితాలు నమలి కవి యౌనె ఖర మెన్న? 

                విమల సుగుణ ధామ వేము భీమ. 

145.         భార్య తోడ నీవు బ్రతుకు టెట్లన్నచో,

                తప్పు చేసి నప్పు డొప్పు కొనుము,

                భార్య తప్పు చేయ పన్నెత్త బోకుము!                                                           

                విమల సుగుణ ధామ వేము భీమ. 

146.           ప్రేమ యనగ నేడు పెద్ద గాలంబయ్యె ,

                  చిక్కె నేని పెద్ద చాప చిక్కు,

                  చిక్క కున్న గూడ చిత్రమౌ ‘టైంపాసు’ -

                                                        విమల సుగుణ ధామ వేము భీమ. 

147.          దుడుకు తోడ వాడు దుప్పటీ విసిరెను

                 శీతకాల మనెడి చింత లేక, 

                 పడచు భార్య తనకు ప్రక్క నున్నది గాన -

                 విమల సుగుణ ధామ వేము భీమ.

                                                                            ….గాథాసప్తతి

148.          కనుల బడడు మనకు కాయజుం డెచ్చోట,

                 అయిన వాడు చేయు ఆగడమ్ము

                 లెంచిచూడ నెడద నిన్నిన్ని గాదయా!

                 విమల సుగుణ ధామ వేము భీమ. 

149.           “అమ్మ ఒడిని మరల నాదమఱచి హాయి

                  నిద్రపోవ తలతు నేను!  కాని

                  అడ్డ మయ్యె నాకు గెడ్డ మొక్కటి నేడు” -

                  విమల సుగుణ ధామ వేము భీమ. 

150.           పైకి క్రింది కెపుడు పరిగెత్తు నెయ్యది,

                  ఆగి పోవ కదల కాగు నెద్ది?

                  ‘సెక్రెటేరియట్టు సీక్రెట్టు ఫైలు’రా!

                  విమల సుగుణ ధామ వేము భీమ.  

151.            భరత దేశమందు ప్రభవించుటే గొప్ప!

                  తెలుగు మాతృభాష గలుగ గొప్ప!

                  భారతీయత మన బ్రదుకు  నింపుటె గొప్ప!

                  విమల సుగుణ ధామ వేము భీమ.           


 
 

 

మీ అభిప్రాయాలు, సలహాలు మాకెంతో అవసరం. దయచేసి మీ అభిప్రాయం ఈ క్రింది పెట్టెలో తెలపండి.
(Please leave your opinion here)

పేరు
ఇమెయిల్
ప్రదేశం 
సందేశం
 
 






సుజనరంజని మాసపత్రిక ఉచితంగా మీ ఇమెయిల్ కి పంపాలంటే వివరాలు కింది బాక్స్‌లో టైపు చేసి
సబ్‍స్క్రైబ్ బటన్ నొక్కగలరు.

 

     

గమనిక: మీ విద్యుల్లేఖా చిరునామా ఎవరితోనూ పంచుకోము; అనవసర టపాలతో మిమ్మలను వేధించము. 
   మీ అభిప్రాయాలను క్లుప్తంగానూ, సందర్భోచితంగానూ తెలుపవలసినది.
(Note: Emails will not be shared to outsiders or used for any unsolicited purposes. Please keep comments relevant.)


 
 
Copyright ® 2001-2012 SiliconAndhra. All Rights Reserved.
   సర్వ హక్కులూ సిలికానాంధ్ర సంస్థకు మరియు ఆయా రచయితలకు మాత్రమే.                                                                                                Site Design: Krishna, Hyd, Agnatech