1985లో వచ్చిన ప్రఖ్యాత హాలీవుడ్ సినిమా Back to the Future సినిమాలో హీరో 30 ఏళ్లు వెనక్కి వెళ్లి తిరిగి అక్కడి నుండి భవిష్యత్తుళొకి (అంటే వర్తమానంలోకి) పయనిస్తాడు. ఈ సంపాదకీయం పేరు ఆ సినిమా పేరుకు తెలుగు అనుసరణ అనుకోవచ్చు.

ఈ నెలతో సిలికానాంధ ఆవిర్భవించి పదిహేనేళ్లు పూర్తి చేసుకొన్నది. సహస్రావధాని గరికిపాటి నరసింహారావు చేతుల మీదూగా జ్యోతీప్రజ్వలన గావించి అష్టావధానం కార్యక్రమంతో తన ప్రయాణాన్ని ప్రారంభించింది. 'ఇంతింతై వటుడింతై' అన్న చందానా, మొక్క మహావృక్షంగా పెరిగిన రీతిన, సిలికానాంధ్ర శాఖోపశాఖలుగా జగమత విస్తరించింది. తెలుగు బావుటాను నిర్విఘ్నంగా ఎగురవేస్తూ, సాహితీ సాంస్కృతిక సంప్రదాయ స్ఫూర్తిని అందరిలోను నింపుతూనే ఉంది. పిల్లలు, నవతరం, యువతరం, పెద్దలు అందరిలో ఉత్తేజం కలిగిస్తున్నది. ప్రతీ ఒక్కరికి సరిపోయేలా ఏదో ఒక నిర్మాణాత్మక కార్యక్రమం చేపడుతూనే ఉంది. సంగీతం, నృత్యం, నాటకం, సాహిత్య కార్యక్రమాల్లో కొత్త ఒరవడిని సృష్టించింది. ఆంతర్జాతీయ సమ్మేళనాలను నిర్వహించింది. మనబడి దేశవిదేశాలకు విస్తరించగా, భారతీయ సంస్కృతి బోధనకు నిలయంగా 'సిలికానాంధ్ర విశ్వవిద్యాలయం' ప్రారంభించింది. ఇలా పేర్కొంటూ, వివరంగా రాస్తే ఒక గ్రంథమే తయారవుతుంది.

సిలికానాంధ్రకు పుట్టినరోజు జేజేలు!!! ఈ సందర్భంగా మళ్లీ ఆగష్టు ఆరున గరికపాటి వారి 'ద్విగుణ అస్టావధానం' సన్నీవేల్ దేవాలయంలో సాయంత్రం గంటలకు ఉంది. అందరూ పుట్టినరోజు వేడుకల్లో పాల్గొనండి.