పిట్ట్స్ బర్గ్ వెంకన్న

- రచన : వాసుదేవ రావు ఎరికలపూడి

పిట్ట్సుబర్గు నందు పిలిచిన పలికెడు
వేంకటేశ్వరుండు వెలసినాడు
కామితముల నొసగు కళ్యాణ మూర్తిగా
కాంతు కొలుతు మతని కఱువు దీర

తల్లి నేల విడచి తరలి వచ్చిన వారి
తండ్రి యై నిలచిన హరియితండు
కడుపు తీపికింత కన్నదృష్టాంతమిం
కొకటి కలదె మూడు లోకములను

ఆగమమ్ము లెన్ని ఆరణ్య కములేమి
జెప్పు యజ్ణ మేల జేయ నిట్టి
ప్రశ్నలన్నియణగు ప్రత్త్యుత్తరమ్మును
కళ్ళ జూడ వచ్చు నెల్ల రిచట

తానె వెంట వచ్చి తనను జూపించి నిన్
జూచువాని చేసి చూడ్కు లిచ్చి
ద్వైతమద్వయితము తన దయన్ కరిగించి
ఏమి ఎరుగ నట్టు లెదుట పడును

తన్మయత్వ మేమొ తాదాత్మ్య మేమిటో
తెలియదేమొగాని తిరిగివచ్చి
మరల మరల జూడ వలెనని యనిపించు
పెన్నుగిరి పడమటి వేంకటాద్రి

ఇతి శివం